തമിഴ് നടൻ തീപ്പെട്ടി ഗണേശൻ അന്തരിച്ചു

തമിഴ് നടൻ തീപ്പെട്ടി ഗണേശൻ അന്തരിച്ചു. ഹൃദയാഘാതമാണ് മരണകാരണം. മധുരയിലെ രാജാജി ആശുപത്രിയിൽ വച്ചായിരുന്നു അന്ത്യം.

സംവിധായകനായ സീനു രാമസാമിയാണ് വാർത്ത സ്ഥിരീകരിച്ചത്. കാർത്തിക്കിന്റെ (തീപ്പെട്ടി ഗണേശൻ) പെട്ടന്നുള്ള വിയോഗം ഞെട്ടലുണ്ടാക്കിയെന്നും രാജാജി ആശുപത്രിയിൽ ഏതാനും നാളുകളായി ചികിത്സയിലായിരുന്നുവെന്നും സീനു കുറിച്ചു.

ലോക്ഡൗൺ കാലത്ത് കടുത്ത സാമ്പത്തിക പ്രതിസന്ധി നേരിട്ടിരുന്ന ഗണേശനെ നടൻ ലോറൻസ് സഹായിച്ചിരുന്നു. ബില്ല 2, റെനിഗുണ്ട, ഉസ്താദ് ഹോട്ടൽ തുടങ്ങിയ ചിത്രങ്ങളിലൂടെ ശ്രദ്ധേയനായിരുന്നു. 2019ൽ റിലീസ് ചെയ്ത കണ്ണേ കലൈമാനെ എന്ന ചിത്രത്തിലാണ് ഗണേശൻ അവസാനം പ്രത്യക്ഷപ്പെട്ടത്.