അര്‍ണബ് ജയില്‍ മോചിതനായി; റോഡ് ഷോ ഒരുക്കി സ്വീകരിച്ച് അണികള്‍
മുംബൈ: ആത്മഹത്യാ പ്രേരണക്കേസില്‍ സുപ്രീം കോടതി ഇടക്കാല ജാമ്യം അനുവദിച്ചതിനെ തുടര്‍ന്ന് റിപ്പബ്ലിക് ടിവി എഡിറ്റര്‍ ഇന്‍ ചീഫ് അര്‍ണബ് ഗോസ്വാമി ജയില്‍ മോചിതനായി. മുംബൈ റായ്ഗഡ് ജില്ലയിലെ തലോജ ജയിലില്‍ നിന്ന് പുറത്തിറങ്ങിയ അര്‍ണബിനെ റോഡ് ഷോ ഒരുക്കിയാണ് അനുയായികള്‍ സ്വീകരിച്ചത്. രാജ്യത്തെ ജനങ്ങളുടെ വിജയമാണിതെന്ന് അദ്ദേഹം പറഞ്ഞു.
ഏഴു ദിവസത്തെ ജയില്‍വാസത്തിന് ശേഷമാണ്‌ അര്‍ണബ് പുറത്തിറങ്ങുന്നത്. നവംബര്‍ നാലിനാണ് മുംബൈയിലെ വസതിയില്‍നിന്ന് അര്‍ണബ് അറസ്റ്റിലായത്. റിപ്പബ്ലിക് ടിവിയുടെ ഇന്റീരിയർ ഡിസൈനർ അന്‍വെയ് നായിക്കിന്റെ ആത്മഹത്യയുമായി ബന്ധപ്പെട്ട കേസിലായിരുന്നു അറസ്റ്റ്. ഇന്റീരിയര്‍ ഡിസൈനറുടെ ഭാര്യ നല്‍കിയ പരാതിയിലാണ് പോലീസ് ആത്മഹത്യാ പ്രേരണക്കുറ്റം ചുമത്തി കേസെടുത്തത്.
അമ്പതിനായിരം രൂപയുടെ ജാമ്യത്തില്‍, അര്‍ണബിനെയും മറ്റു രണ്ട് പ്രതികളെയും മോചിപ്പിക്കാന്‍ സുപ്രീം കോടതി ഉത്തരവിടുകയായിരുന്നു. ജാമ്യം നിഷേധിച്ച ബോംബെ ഹൈക്കോടതി ഉത്തരവ് തെറ്റാണെന്നും ജസ്റ്റിസ് ഡി.വൈ. ചന്ദ്രചൂഡ് അധ്യക്ഷനായ ബെഞ്ച് വ്യക്തമാക്കി. ബുധനാഴ്ചയാണ് സുപ്രീം കോടതി അദ്ദേഹം അടക്കം മൂന്നുപേര്‍ക്ക് കേസില്‍ ഇടക്കാല ജാമ്യം അനുവദിച്ചത്.
