ബിനീഷ് കോടിയേരിയുടെ വീട്ടില് എന്ഫോഴ്സ്മെന്റ് പരിശോധന നടത്തും
ബംഗളൂരു മയക്കുമരുന്നുകേസില് അറസ്റ്റ് ചെയ്ത ബിനീഷ് കോടിയേരിയുടെ വീട്ടില് എന്ഫോഴ്സ്മെന്റ് ഡയറക്ടറേറ്റ് പരിശോധന നടത്തും. ആദായനികുതി സംഘവും ഇ ഡി അധികൃതര്ക്കൊപ്പമുണ്ട്. ബംഗളൂരുവില് നിന്നുള്ള എട്ടംഗ സംഘമാണ് തിരുവനന്തപുരത്ത് എത്തിയിരിക്കുന്നത്.
ബെംഗളൂരു മയക്കുമരുന്ന് കേസുമായി ബന്ധപ്പെട്ട് ബിനീഷ് കോടിയേരി അറസ്റ്റിലായ പശ്ചാത്തലത്തിലാണ് ബിനീഷുമായി ബന്ധപ്പെട്ട വിവിധ കേന്ദ്രങ്ങളില് പരിശോധന നടത്തുന്നത്. കഴിഞ്ഞ ദിവസങ്ങളില് ബിനീഷ് കോടിയേരിയെ ചോദ്യംചെയ്തതിനെ തുടര്ന്ന് ലഭിച്ച വിവരങ്ങളുടെ അടിസ്ഥാനത്തിലാണ് പരിശോധന. ബിനീഷിന്റെ പണമിടപാടുകള് സംബന്ധിച്ച കൂടുതല് വിവരങ്ങള് ശേഖരിക്കുന്നതിന്റെ ഭാഗമായാണ് പരിശോധന.
ബിനീഷുമായി അടുപ്പമുള്ളവരുടെ സ്ഥാപനങ്ങളിലും തെരച്ചില് നടത്തും. തിരുവനന്തപുരത്ത മരുതംകുഴിയിലെ വസതിയില് തെരച്ചില് നടത്തും. അതേസമയം എന്ഫോഴ്സ്മെന്റ് അറസ്റ്റ് ചെയ്ത ബിനീഷ് കോടിയേരിയെ കാണാന് അഭിഭാഷകനെ ഇന്നും അനുവദിച്ചില്ല. കൊവിഡ് പരിശോധനാഫലം ഇല്ലാതെ ബിനീഷിനെ കാണാന് അനുമതി നല്കില്ലെന്ന് ഇ.ഡി നിലപാടെടുത്തു.
