പത്തനംതിട്ടയിൽ 21കാരി പ്രസവിച്ച കുഞ്ഞിനെ വീട്ടുമുറ്റത്ത് കുഴിച്ചിട്ടു; കേസെടുത്തു
മല്ലപ്പള്ളി:ആനിക്കാട് കാരിക്കാമലയിൽ ഇരുപത്തൊന്നുകാരി പ്രസവിച്ച കുഞ്ഞിനെ കുഴിച്ചുമൂടിയതായി കേസ്. കുഴിച്ചു മൂടിയ നവജാത ശിശുവിന്റെ മൃതദേഹം പുറത്തെടുത്തു.സംഭവത്തിൽ കീഴ്പാവൂർ പൊലീസ് കേസ് രജിസ്റ്റർ ചെയ്തിട്ടുണ്ട്.വീടിന്റെ പിൻവശത്തെ മുറ്റത്താണ് മൃതദേഹം കുഴിച്ചുമൂടിയത്. തിരുവല്ല ആർ.ഡി.ഒയുടെ നേതൃത്വത്തിൽ മൃതദേഹം കോട്ടയം മെഡിക്കൽ കോളേജ് ആശുപത്രിയിലേക്ക് പോസ്റ്റ് മോർട്ടം നടപടികൾക്കായി കൊണ്ടുപോയി.
വെള്ളിയാഴ്ച രാവിലെ യുവതി സ്വന്തം വീട്ടില് പ്രസവിക്കുകയും കുഞ്ഞിനെ പിൻവശത്തെ മുറ്റത്തിനു സമീപം കുഴിച്ചിടുകയും ചെയ്തതായി പൊലീസ് പറഞ്ഞു. യുവതിയും കുടുംബാംഗങ്ങളും പൊലീസ് നിരീക്ഷണത്തിലാണ്.കുഞ്ഞിനെ കുഴിച്ചിട്ടത് ജീവനോടെയാണോ എന്ന് പോസ്റ്റ് മോർട്ടത്തിന് ശേഷം മാത്രമേ പറയാനാവുമെന്ന് പൊലീസ് വ്യക്തമാക്കി.
