കൊവിഡ് പോസിറ്റീവായ മലയാളി ഹൃദയാഘാതം മൂലം മരിച്ചു

റിയാദ്‌: ഹൃദയസംബന്ധമായ അസുഖത്തെ തുടർന്ന് റിയാദിലെ ആശുപത്രിയിൽ ചികിത്സയിലായിരുന്ന മലയാളി നിര്യാതനായി. കണ്ണൂർ പയ്യന്നൂർ വെള്ളൂർ സ്വദേശി കടിഞ്ഞാപ്പള്ളി പുതിയവീട്ടിൽ ജയപ്രകാശ് നമ്പ്യാർ (48) ആണ് റിയാദ് സുവൈദിയിലെ അൽഹമാദി ആശുപത്രിയിൽ ഹൃദയസ്തംഭനം മൂലം മരിച്ചത്.

ഹൃദയധമനിയിൽ രക്തയോട്ടം തടസ്സപ്പെട്ടതിനെ തുടർന്നാണ് ബുധനാഴ്ച ആശുപത്രിയിൽ പ്രവേശിപ്പിച്ചത്. ഉടനെ തന്നെ ശസ്ത്രക്രിയക്ക് വിധേയമാക്കി. തുടർന്ന് തീവ്രപരിചരണ വിഭാഗത്തിൽ കഴിയുന്നതിനിടയിലായിരുന്നു മരണം. കൊവിഡ് പരിശോധന നടത്തിയപ്പോൾ ആദ്യ തവണ നെഗറ്റീവായിരുന്നെങ്കിലും രണ്ടാം പരിശോധനയിൽ പോസിറ്റീവാണെന്ന് തെളിഞ്ഞിരുന്നു.

റിയാദിൽ ദീർഘകാലമായി താമസിക്കുകയായിരുന്ന ഇദ്ദേഹം വാബെൽ അൽഅറേബ്യ കമ്പനിയിലാണ് ജോലി ചെയ്തിരുന്നത്. ഭാര്യ: ശ്രീപ്രിയ. മക്കൾ: നന്ദന ജയപ്രകാശ്, നവനീത് ജയപ്രകാശ്. സാമൂഹികപ്രവർത്തകൻ കൂടിയായ ജയപ്രകാശ് റിയാദിലെ തറവാട് കുടുംബകൂട്ടായ്മയുടെ സെക്രട്ടറിയായി പ്രവർത്തിക്കുകയും ചെയ്തിട്ടുണ്ട്.