കൊച്ചി: ഈ വർഷത്തെ മാക്ട ലെജൻഡ് ഓണർ പുരസ്കാരത്തിന് പ്രശസ്ത സംവിധായകൻ കെ എസ് സേതുമാധവൻ അർഹനായി. സുദീർഘമായ ആറു പതിറ്റാണ്ടുകളായി ചലച്ചിത്രവേദിക്ക് നൽകി വരുന്ന ആദരണീയമായ ബഹുമുഖ സംഭാവനകളെ ബഹുമാനിച്ച് കെ എസ് സേതുമാധവനെ ഐകകണ്ഠേന പുരസ്കാരത്തിനായി തെരഞ്ഞെടുകയായിരുന്നുവെന്ന് ജൂറി അംഗങ്ങൾ അറിയിച്ചു.
മലയാളത്തിനു പുറമെ തെന്നിന്ത്യൻ ഭാഷകളിലും കെ എസ് സേതുമാധവൻ വളരെ സജീവമായിരുന്നു. സംസ്ഥാന ദേശീയ അവാർഡുകൾ നിരവധി തവണ കരസ്ഥമാക്കിട്ടുണ്ട്. സംവിധായകൻ, നിർമ്മാതാവ്, തിരക്കഥാകൃത്ത് എന്നി നിലകളിൽ അദ്ദേഹത്തിന്റെ ക്രിയാത്മകമായ പങ്കാളിത്തം നിസ്തുലമാണെന്ന് ജൂറി വിലയിരുത്തി.
ജോൺ പോൾ ചെയർമാനും കലൂർ ഡെന്നീസ് കൺവീനറും ഫാസിൽ, സിബി മലയിൽ, കമൽ എന്നിവർ ജൂറി അംഗങ്ങളുമായിരുന്നു. മലയാളചലച്ചിത്ര ശാഖയ്ക്ക് സമഗ്ര സംഭാവന നൽകിയ പ്രതിഭകളായ സാങ്കേതിക വ്യക്തിത്വങ്ങൾക്ക് രണ്ടുവർഷം കൂടുമ്പോൾ മാക്ട നൽകിപ്പോരുന്ന പുരസ്കാരമാണ് മാക് ദി ലെജൻഡ് ഓണർ പുരസ്കാരം. എം ടി വാസുദേവൻ നായരും മധുവുമാണ് പോയ വർഷങ്ങളിൽ പുരസ്കാരത്തിന് അർഹരായത്. ജോൺ പോൾ ചെയർമാനും കലൂർ ഡെന്നീസ് കൺവീനറും സംവിധായകരായ ഫാസിൽ, സിബി മലയിൽ, കമൽ എന്നിവർ ജൂറി അംഗങ്ങളും ആയിരുന്നു.
