ഷാരൂഖ് ഖാന്റെ മകന് ആര്യന് ഖാനെ എന്സിബി ചോദ്യം ചെയ്യുന്നു: പിടിയിലായവരില് വ്യവസായ പ്രമുഖന്റെ പെണ്മക്കളും
മുംബൈ: മുംബൈ തീരത്ത് ആഡംബര കപ്പലില് മയക്കുമരുന്ന് പാര്ട്ടി നടത്തിയ സംഭവത്തില് ബോളിവുഡ് സൂപ്പര് താരം ഷാരൂഖ് ഖാന്റെ മകന് ആര്യന് ഖാനെ നാര്ക്കോട്ടിക്സ് കണ്ട്രോള് ബ്യൂറോ (എന്സിബി) ചോദ്യം ചെയ്യുന്നു. സംഭവവുമായി ബന്ധപ്പെട്ട് ആര്യന് ഖാനെതിരേ ഇതുവരെ കേസ് രജിസ്റ്റര് ചെയ്തിട്ടില്ല. സംഭവവുമായി ബന്ധപ്പെട്ട് മൂന്ന് യുവതികള് ഉള്പ്പെടെ 13 പേരെയാണ് എന്.സി.ബി. കസ്റ്റഡിയിലെടുത്തിട്ടുള്ളത്. ആര്യന് ഖാനെ റേവ് പാര്ട്ടിയിലേക്ക് സംഘാടകര് അതിഥിയായി നേരിട്ട് ക്ഷണിച്ചതായാണ് വിവരം. പാര്ട്ടിയില് പങ്കെടുക്കാന് ആര്യന് ഖാന് പണംമുടക്കിയിരുന്നില്ല.
പാര്ട്ടിയില് ആര്യന് ഖാന് ബന്ധമുണ്ടയെന്നും ഇയാള് മയക്കുമരുന്ന് ഉപയോഗിച്ചിരുന്നോ എന്ന കാര്യവും പരിശോധിച്ച് വരികയാണ്. ഫോണിലെ ചാറ്റുകളും പരിശോധിക്കുന്നുണ്ട്. പാര്ട്ടിയില് പങ്കെടുക്കാനായി ഡല്ഹിയില് നിന്ന് എത്തിയ മൂന്ന് പെണ്കുട്ടികളും നര്ക്കോട്ടിക്സ് ബ്യൂറോയുടെ കസ്റ്റഡിയിലുണ്ട്. ഇവരേയും ചോദ്യം ചെയ്തു വരികയാണ്. പ്രമുഖ വ്യവസായിയുടെ മകള് അടക്കമുള്ളവരാണിതെന്നാണ് പുറത്തുവരുന്ന റിപ്പോര്ട്ടുകള്.
കോര്ഡിലിയ ക്രൂയിസ് ആഡംബര കപ്പലില് എന്സിബി സംഘം നടത്തിയ റെയ്ഡിനേത്തുടര്ന്ന് എട്ട് പേര് പിടിയിലായിരുന്നു. കൊക്കെയ്ന്, ഹാഷിഷ്, എംഡിഎംഎ അടക്കമുള്ള നിരോധിത മയക്കുമരുന്നുകള് പിടിച്ചെടുത്തിട്ടുണ്ട്. രണ്ടാഴ്ച മുമ്പ് ഉദ്ഘാടനം ചെയ്യപ്പെട്ട കപ്പലില് ശനിയാഴ്ച കപ്പലില് നടന്ന പാര്ട്ടിക്ക് ഇടയിലായിരുന്നു എന്സിബിയുടെ റെയ്ഡ്. എട്ടുപേരെ അറസ്റ്റ് ചെയ്തതായി എന്സിബി സോണല് ഡയറക്ടര് സമീര് വാങ്കഡെ പറഞ്ഞിരുന്നു.
