ക്യൂ നിന്ന് വലയേണ്ട: വീട്ടിലിരുന്ന് ഒപി ടിക്കറ്റെടുക്കാം; ഇ ഹെല്ത്ത് പോര്ട്ടലുമായി ആരോഗ്യ വകുപ്പ്
സംസ്ഥാനത്ത് ഇ ഹെല്ത്ത് വെബ് പോര്ട്ടല് (https://ehealth.kerala.gov.in) ഉപയോഗിച്ച് വീട്ടിലിരുന്നും ഒപി ടിക്കറ്റെടുക്കാൻ സാധിക്കുമെന്ന് ആരോഗ്യ മന്ത്രി വീണ ജോര്ജ്. ഇ ഹെല്ത്ത് സൗകര്യമുള്ള 300ല് പരം ആശുപത്രികളില് ഓണ്ലൈന് ബുക്കിംഗ് വഴി നിശ്ചിത തീയതിയിലും സമയത്തും ഡോക്ടറുടെ സേവനം ലഭിക്കും. എന്നും മന്ത്രി വ്യക്തമക്കി.
ഒരാളിന്റെ ആരോഗ്യ സംബന്ധമായ എല്ലാ വിവരങ്ങളും ഉള്ക്കൊള്ളുന്ന ഒരു ഏകീകൃത തിരിച്ചറിയല് നമ്പരും (Unique Health ID) ഈ വെബ്പോര്ട്ടല് വഴി ലഭ്യമാകും. ആശുപത്രിയെക്കുറിച്ചുള്ള വിവരങ്ങള്, ലഭ്യമായ സേവനങ്ങള്, ചികിത്സാ സമയം, ലാബ് ടെസ്റ്റുകളെക്കുറിച്ചുള്ള വിവരങ്ങള് എന്നിവയും പോര്ട്ടല് വഴി അറിയാന് സാധിക്കുന്നു. തിരുവനന്തപുരം മെഡിക്കല് കോളേജ് പോലെയുള്ള റെഫറല് ആശുപത്രികളിലേക്ക് അപ്പോയ്മെന്റ് എടുക്കുവാന് റെഫറന്സ് ആവശ്യമാണ്.
യുനീക്ക് ഹെല്ത്ത് ഐഡി ഉണ്ടാക്കുന്നതെങ്ങനെ
ഇ ഹെല്ത്ത് വഴിയുള്ള സേവനങ്ങള് ലഭിക്കുവാന് ആദ്യമായി തിരിച്ചറിയില് നമ്പര് സൃഷ്ടിക്കണം. അതിനായി https://ehealth.kerala.gov.in എന്ന പോര്ട്ടലില് കയറി രജിസ്റ്റര് ലിങ്ക് ക്ലിക്ക് ചെയ്യണം. അതില് ആധാര് നമ്പര് നല്കുക. തുടര്ന്ന് ആധാര് രജിസ്റ്റര് ചെയ്ത നമ്പരില് ഒടിപി വരും. ഈ ഒടിപി നല്കി ഓണ്ലൈന് വ്യക്തിഗത ആരോഗ്യ തിരിച്ചറിയല് നമ്പര് ലഭ്യമാകും. ആദ്യതവണ ലോഗിന് ചെയ്യുമ്പോള് ഇത്തരത്തിലുള്ള 16 അക്ക വ്യക്തിഗത ആരോഗ്യ തിരിച്ചറിയല് നമ്പറും പാസ് വേര്ഡും മൊബൈലില് മെസേജായി ലഭിക്കും. ഈ തിരിച്ചറിയല് നമ്പറും പാസ് വേര്ഡും ഉപയോഗിച്ച് ആശുപതികളിലേക്കുള്ള നിശ്ചിത തീയതിയിലേക്കും സമയത്തും അപ്പോയ്മെന്റ് എടുക്കാന് സാധിക്കും.
