ന്യൂഡല്‍ഹി: തിരഞ്ഞെടുപ്പ് പ്രചാരണം നടത്തുന്നതിനിടെ ഡല്‍ഹി മുഖ്യമന്ത്രിയും ആം ആദ്മി പാര്‍ട്ടി നേതാവുമായ അരവിന്ദ് കെജ്‌രിവാളിനെ യുവാവ് മര്‍ദ്ദിച്ചു. പ്രചാരണ വാഹനത്തില്‍ കയറി യുവാവ് ചെരിപ്പുകൊണ്ട് അദ്ദേഹത്തിന്റെ മുഖത്തടിച്ചു.ആക്രമണത്തിനുള്ള പ്രകോപനം എന്തെന്ന് വ്യക്തമായിട്ടില്ല.മോട്ടി നഗര്‍ പ്രദേശത്ത് പ്രചാരണം നടത്തുന്നതിനിടെയാണ് സംഭവം നടന്നത്.അക്രമിയെ പോലീസ് കസ്റ്റഡിയിലെടുത്തു.
സംഭവത്തിന്റെ വീഡിയോ ദൃശ്യങ്ങള്‍ എ.എന്‍.ഐ വാര്‍ത്താ ഏജന്‍സി പുറത്തുവിട്ടു.സ്ഥാനാര്‍ഥികള്‍ക്കൊപ്പം തുറന്ന ജീപ്പില്‍ പ്രചാരണം നടത്തുന്നതിനിടെയാണ് ആക്രമണമുണ്ടായത്. ജനക്കൂട്ടത്തിനിടയില്‍നിന്ന് വാഹനത്തിലേക്ക് കയറിയ യുവാവ് അദ്ദേഹത്തിന്റെ മുഖത്തടിച്ചു. ആം ആദ്മി പാര്‍ട്ടി പ്രവര്‍ത്തകര്‍ അക്രമിയെ പിടികൂടി മര്‍ദ്ദിച്ചുവെന്ന് ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.
ആക്രമണത്തിനു പിന്നിൽ ബിജെപിയാണെന്നു എഎപി ആരോപിച്ചു. മുഖ്യമന്ത്രിക്കു സുരക്ഷ ഒരുക്കുന്നതിൽ വീഴ്ചവരുത്തിയതിനെ അപലപിക്കുന്നതായും എഎപി ട്വിറ്ററിൽ കുറിച്ചു.
