ആനക്കുളത്തെ വാഹനാപകടം; മരണ സംഖ്യ നാലായി

മാങ്കുളം: ഇടുക്കി മാങ്കുളം ആനക്കുളത്ത് ട്രാവലർ മറിഞ്ഞ് അപകടത്തിൽ പെട്ട് മരിച്ചവരുടെ എണ്ണം 4 ആയി. തേനി സ്വദേശി അഭിനേഷ് മൂർത്തിയാണ് മരിച്ചത്. അഭിനേഷിന്‍റെ ഒരു വയസുള്ള മകൻ ധൻവി അപകടത്തിൽ മരിച്ചിരുന്നു. ചിന്നമണ്ണൂർ സ്വദേശി ഗുണശേഖരൻ (70) ഈറോഡ് സ്വദേശി പി.കെ. സേതു (45) എന്നിവരും അപകടത്തിനു പിന്നാലെ മരിച്ചിരുന്നു. 12 ൽ അധികം പേർക്ക് പരുക്കേറ്റിട്ടുണ്ട്.

തമിഴ്നാട്ടിൽ നിന്ന് വിനോദസഞ്ചാരത്തിനെത്തിയ വാഹനമാണ് അപകടത്തിൽപ്പെട്ടത്. പരുക്കേറ്റവരിൽ ഒരാളുടെ നിലഗുരുതരമാണ്. കുവൈറ്റ് സിറ്റിക്ക് സമീപം പേമരം വളവിലാണ് അപകടം സംഭവിച്ചത്. പതിനാലോളം പേരാണ് വാഹനത്തിൽ ഉണ്ടായിരുന്നതെന്നാണ് വിവരം.