സംസ്ഥാനത്ത് ഇന്ന് 7 പേര്ക്ക് കോവിഡ് സ്ഥിരീകരിച്ചു; 27 പേർ രോഗമുക്തരായി
തിരുവനന്തപുരം ∙ സംസ്ഥാനത്ത് ഇന്ന് 7 പേര്ക്ക് കോവിഡ് സ്ഥിരീകരിച്ചതായി മുഖ്യമന്ത്രി പിണറായി വിജയൻ. കണ്ണൂര് ജില്ലയില് നിന്നുള്ള 4 പേര്ക്കും കോഴിക്കോട് ജില്ലയില് നിന്നുള്ള 2 പേര്ക്കും കാസർകോട് ജില്ലയില് നിന്നുള്ള ഒരാള്ക്കുമാണ് രോഗം സ്ഥിരീകരിച്ചത്. ഇതില് 5 പേര് വിദേശത്തു നിന്നും വന്നവരാണ്. 2 പേര്ക്ക് സമ്പര്ക്കത്തിലൂടെയാണ് രോഗം ബാധിച്ചത്. ഇന്ന് 27 പേര് രോഗമുക്തി നേടി ആശുപത്രി വിട്ടതായും മുഖ്യമന്ത്രി അറിയിച്ചു.
കാസര്കോട് നിന്നാണ് ഏറ്റവും കൂടുതല് പേര് ഇന്ന് ആശുപത്രി വിട്ടത്. 24 പേര്. എറണാകുളം, കണ്ണൂര്, മലപ്പുറം ജില്ലകളില് നിന്ന് ഓരോരുത്തര് വീതവും ആശുപത്രി വിട്ടു. ഇതുവരെ 394 പേർക്കാണ് രോഗം സ്ഥിരീകരിച്ചത്. അതിൽ 147 പേർ ഇപ്പോൾ ചികിത്സയിലാണ്. 88855 പേരാണ് സംസ്ഥാനത്ത് നിരീക്ഷണത്തിലുള്ളത്. വീടുകളിൽ 88332 പേരും ആശുപത്രികളിൽ 532 പേരും ഉണ്ട്. ഇന്ന് മാത്രം 108 പേരെ ആശുപത്രിയിൽ പ്രവേശിപ്പിച്ചു. ഇതുവരെ 17400 സാമ്പിളുകൾ പരിശോധനക്ക് അയച്ചു. 16459 എണ്ണം രോഗബാധയില്ലെന്ന് ഉറപ്പാക്കി. അതേസമയം രേഗം ഭേദമായവരുടെ എണ്ണത്തിലുണ്ടാകുന്ന വലിയ വര്ദ്ധന കേരളത്തിന് വലിയ ആശ്വാസമാണ്.
