ശരീരത്തിൽ തീയുമായി ഓടി, അഗ്നിശമനാ സേനാംഗത്തിന് ഗിന്നസ് റെക്കോർഡ്

ദേഹം മുഴുവൻ തീപിടിപ്പിച്ചതിന് ശേഷം ഫ്രഞ്ച് അഗ്നിശമന സേനാംഗം ഓടി നേടിയത് ഗിന്നസ് വേൾഡ് റെക്കോർഡാണ്. തീപിടിച്ച ശരീരവുമായി ഓക്സിജനില്ലാതെ ഏറ്റവും കൂടുതൽ ഓടിയ ആളെന്ന റെക്കോർഡാണ് ഇദ്ദേഹം സ്വന്തമാക്കിയത്.

39കാരനായ ജോനാഥൻ വെറോ ആണ് ശരീരം മുഴുവൻ കത്തിച്ചതിന് ശേഷം ഓടിയത്. 272.25 മീറ്റർ (893 അടി) ഓടിയാണ് റെക്കോർഡ് സ്വന്തമാക്കിയത്. സംരക്ഷിത സ്യൂട്ട് ധരിച്ചിരുന്നു. 204.23 മീറ്റർ (670 അടി) എന്ന റെക്കോർഡാണ് തകർത്തത്.

ഓക്‌സിജൻ സഹായമില്ലാതെ 100 മീറ്റർ സ്‌പ്രിന്റ് ഏറ്റവും വേഗത്തിൽ പൂർത്തിയാക്കി എന്ന റെക്കോർഡും ജോനാഥൻ സ്വന്തമാക്കി. നേരത്തെ ഈ രണ്ട് റെക്കോർഡുകളും ബ്രിട്ടനിലെ ആന്റണിയുടെ പേരിലായിരുന്നു.

ജോനാഥന്റെ വിഡിയോ ഗിന്നസ് വേൾഡ് റെക്കോർഡിന്റെ ഔദ്യോഗിക സമൂഹ മാധ്യമ അക്കൗണ്ടിൽ പങ്കുവച്ചു. ‘ഈ പ്രകടനത്തിന് എനിക്ക് വളരെയധികം സന്തോഷമുണ്ട്, ഒരു അഗ്നിശമന സേനാംഗം എന്ന നിലയിലുള്ള എന്റെ ജോലിക്കും, എന്നെ പരിശീലിപ്പിച്ച ആളുകൾക്കും എന്റെ വളർച്ചയെ നിരീക്ഷിച്ചവർക്കുമാണ് റെക്കോർഡ്. ഗിന്നസ് റെക്കോർഡ് നേടുക എന്നത് ബാല്യകാല സ്വപ്നമായിരുന്നു. ഇനിയും ഒരുപാട് റെക്കോർഡ് നേടാൻ ശ്രമിക്കും’. – ജോനാഥൻ വെറോ പറഞ്ഞു.