കൂടത്തായിയിലെ ദുരൂഹമരണങ്ങള്; കല്ലറ തുറന്ന് പരിശോധന തുടങ്ങി
കോഴിക്കോട്: കൂടത്തായിയില് ആറുപേരുടെ ദുരൂഹമരണവുമായി ബന്ധപ്പെട്ട് കോടഞ്ചേരി സെന്റ് മേരീസ് ഫറോന പള്ളിയിലെ കല്ലറകള് തുറന്നു. സിലിയുടെയും രണ്ടുവയസ്സു പ്രായമുള്ള കുഞ്ഞിന്റെയും മൃതദേഹങ്ങള് അടക്കിയ കല്ലറകളാണ് ആദ്യം തുറന്നത്. ആറു മരണങ്ങളില് ഏറ്റവും അവസാനം നടന്ന മരണങ്ങളായതുകൊണ്ടാണ് ഇവരുടെ കല്ലറകള് ആദ്യം തുറക്കുന്നതെന്ന് അന്വേഷണ സംഘം അറിയിച്ചു.
പൊലീസും ഫോറന്സിക് വിദഗ്ധരും പരിശോധന നടത്തി.ആറുപേരുടെയും കല്ലറകൾ തുറന്നാണ് പരിശോധന. ആരെയും ലക്ഷ്യമിട്ടുള്ള അന്വേഷണമല്ല നിലവിൽ നടക്കുഇതിൽ വ്യക്തത തേടിയാണ് കല്ലറകൾ തുറക്കുന്നതെന്ന് വടകര റൂറൽ എസ് പി പറഞ്ഞു.
വര്ഷങ്ങളുടെ ഇടവേളയില് നടന്ന മരണങ്ങളില് സംശയം പ്രകടിപ്പിച്ച് ക്രൈംബ്രാഞ്ചിന് പരാതി ലഭിച്ചതിനെ തുടര്ന്നാണ് നടപടി. കോഴിക്കോട് മെഡിക്കല് കോളജ് ഫൊറന്സിക് മേധാവിയടക്കം ആറംഗ വിദഗ്ധ സംഘമാണ് പരിശോധന നടത്തുന്നത്.
റിട്ട. വിദ്യാഭ്യാസ വകുപ്പ് ഉദ്യോഗസ്ഥൻ കൂടത്തായി പൊന്നാമറ്റം ടോം തോമസ് (66), ഭാര്യ റിട്ട. അധ്യാപിക അഅന്നമ്മ (57), മകൻ റോയി തോമസ് (40), ബന്ധുവായ യുവതി സിലി, സിലിയുടെ മകൾ അൽഫോൻസ( 2), അന്നമ്മയുടെ സഹോദരൻ മാത്യു മഞ്ചാടിയിൽ (68), എന്നിവരുടെ മൃതദേഹങ്ങളാണ് പുറത്തെടുക്കുക.
2002 ലാണ് അന്നമ്മയുടെ മരണം. ടോംതോമസ് 2008ലും റോയി 2011ലും മാത്യു 2014ലുമാണ് മരിച്ചത്. പിന്നീട് സിലിയുടെ കുട്ടിയും തുടര്ന്ന് 2016ല് സിലിയും മരിച്ചു. മരിച്ച റോയിയുടെ ഭാര്യയുടെ രണ്ടാം ഭർത്താവായ ഷാജുവിന്റെ ഭാര്യയാണു സിലി.
പെട്ടെന്ന് അസ്വസ്ഥത അനുഭവപ്പെട്ട് കുഴഞ്ഞു വീണായിരുന്നു മിക്കവരുടെയും മരണം. ടോം തോമസിന്റെ സ്വത്തുക്കള് വ്യാജ ഒസ്യത്തിന്റെ സഹായത്തോടെ നഷ്ടപ്പെട്ടതിനെ തുടര്ന്നാണ് മരണം സംബന്ധിച്ച സംശയങ്ങള് ഉണ്ടായത്. തുടര്ന്നാണ് അമേരിക്കയിലുള്ള ഇവരുടെ മകന് റോജോ പരാതി നല്കിയത്. റോയിയുടെ മൃതദേഹം പോസ്റ്റ്മോര്ട്ടം നടത്തിയപ്പോള് വിഷം ഉള്ളില് ചെന്നതായി കണ്ടെത്തിയിരുന്നു.
