കഥകളി ആചാര്യന് കോട്ടക്കല് ചന്ദ്രശേഖര വാര്യര് അന്തരിച്ചു
കോട്ടക്കല്: പ്രമുഖ കഥകളി ആചാര്യനും പി.എസ്.വി നാട്യസംഘം മേധാവിയുമായിരുന്ന കോട്ടക്കല് ചന്ദ്രശേഖര വാര്യര് (74) അന്തരിച്ചു. ഹൃദയസംബന്ധമായ അസുഖത്തെ തുടര്ന്ന് സ്വകാര്യ ആശുപത്രിയിലായിരുന്നു അന്ത്യം. സംസ്കാരം വ്യാഴാഴ്ച ഉച്ചക്ക് ഒരുമണിക്ക് കോട്ടക്കൽ വെച്ച് നടക്കും. പട്ടാമ്പി നടുവട്ടം സ്വദേശിയാണ്. പി.എസ്.വി നാട്യസംഘത്തിലൂടെ കഥകളി അഭ്യസിച്ചായിരുന്നു തുടക്കം.
കഥകളി വേഷത്തിന് 2017ല് കേരള സംഗീതനാടക അക്കാദമി അവാര്ഡ് ലഭിച്ചിട്ടുണ്ട്. കേന്ദ്ര സംഗീത നാടക അക്കാദമി അവാർഡ്, കേരള സംഗീത നാടക അക്കാദമി അവാർഡ്, കലാമണ്ഡലം അവാർഡ്, തുളസീവനം അവാർഡ് തുടങ്ങി ഒട്ടേറെ പുരസ്ക്കാരങ്ങൾ ലഭിച്ചിട്ടുണ്ട്. സുശീല ദേവി ഭാര്യയും ഡോ. ജ്യോത്സ്ന, ജിതേഷ് എന്നിവർ മക്കളുമാണ്. സന്തോഷ് മരുമകനാണ്.
