വിശദീകരണം തൃപ്തികരം; ശിവദാസൻ നായരുടെ സസ്പെൻഷൻ കെപിസിസി പിൻവലിച്ചു
തിരുവനന്തപുരം: അച്ചടക്ക ലംഘനത്തിന് സസ്പെന്റ് ചെയ്ത കെ ശിവദാസന്‍ നായരെ കോൺഗ്രസ് തിരിച്ചെടുത്തു. കെപിസിസി നൽകിയ നോട്ടീസിന് മുന്‍ ജനറല്‍ സെക്രട്ടറിയും മുൻ എംഎൽ എയുമായ ശിവദാസന്‍ നായര്‍ തൃപ്തികരമായ മറുപടി നല്‍കുകയും ഖേദം പ്രകടിപ്പിക്കുകയും ചെയ്ത സാഹചര്യത്തിലാണ് നടപടി.
മറുപടി തൃപ്തികരമായതിനാലും ഖേദം പ്രകടിപ്പിച്ചതിനാലും സസ്‌പെന്‍ഷന്‍ റദ്ദു ചെയ്യാനും പാര്‍ട്ടിയില്‍ തിരികെ എടുക്കുവാനും തീരുമാനിച്ചതായാണ് കെ സുധാകരൻ അറിയിച്ചിരിക്കുന്നത്. മുന്നോട്ടുള്ള പ്രയാണത്തിൽ പാർട്ടിക്ക് കരുത്തും ശക്തിയും നൽകാൻ ശിവദാസൻ നായരുടെ സേവനം ആവശ്യമാണെന്നും സുധാകരൻ പറഞ്ഞു.
സസ്പെൻഷൻ പിൻവലിച്ചതിൽ സന്തോഷം എന്ന് ശിവദാസൻ നായർ പ്രതികരിച്ചു. പാർട്ടിയെ ശക്തിപ്പെടുത്താൻ തുടർന്നും ശ്രമിക്കും എന്നും അദ്ദേഹം പറഞ്ഞു. കോൺഗ്രസിനെതിരെ പരസ്യ പ്രസ്താവന നടത്തിയതിന്റെ പേരിലാണ് ശിവദാസൻ നായർക്കെതിരെ നടപടിയെടുത്തത്. ഇതിന് പിന്നാലെ കെപിസിസി അദ്ദേഹത്തിന് നോട്ടീസ് നൽകുകയും പാർട്ടിയിൽ തിരികെ എടുക്കുവാൻ തീരുമാനിക്കുകയായിരുന്നുവെന്ന് കെപിസിസി പ്രസിഡന്റ കെ സുധാകരൻ വ്യക്തമാക്കി.
