അരുൺ ഗോപി പ്രണവ് മോഹൻലാൽ കൂട്ടുകെട്ടിലൊരുങ്ങുന്ന ഇരുപത്തിയൊന്നാം നൂറ്റാണ്ട് റിലീസിനൊരുങ്ങുന്നു. രാമലീലയ്ക്കു ശേഷം അരുണ്‍ ഗോപി സംവിധാനം ചെയ്യുന്ന ചിത്രമാണിത്. പുതുമുഖം റേച്ചൽ ആണ് ചിത്രത്തിലെ നായിക. പ്രണവിനൊപ്പം സുരേഷ് ഗോപിയുടെ മകൻ ഗോകുൽ സുരേഷും ചിത്രത്തിൽ പ്രധാനവേഷത്തിലെത്തുന്നു.
ഇരുപതാം നൂറ്റാണ്ടെന്ന മോഹന്‍ലാലിന്‍റെ പഴയ ഹിറ്റ് സിനിമയുമായി പേരില്‍ അല്‍പം സാമ്യംപറയാമെങ്കിലും ഇത് ആ സിനിമയല്ല. ഇരുപത്തിയൊന്നാം നൂറ്റാണ്ട് ഒരു റൊമാന്‍റിക്ക് ആക്ഷന്‍ സിനിമയാണ്. ഒരു സർഫറിന്‍റെ കഥാപാത്രത്തെയാണ് ചിത്രത്തിൽ പ്രണവ് അവതരിപ്പിക്കുന്നത്. കഥാപാത്രത്തിന്‍റെ പൂർണതയ്ക്കായി പ്രണവ് ഇന്തോനേഷ്യയിലെ ബാലിയില്‍ പോയി സര്‍ഫിംഗ് വശമാക്കിയിരുന്നു.
ആദിയിലൂടെ നായകനായി അരങ്ങേറ്റം കുറിച്ച പ്രണവിന്‍റെ രണ്ടാമത്തെ സിനിമയാണിത്.
കൊച്ചി അഞ്ജുമന ക്ഷേത്രത്തില്‍ മകന്‍റെ സിനിമയുടെ പൂജയില്‍ മോഹന്‍ലാലും സുചിത്രയും പങ്കുചേര്‍ന്നു ഗോവയിലും കൊച്ചിയിലുമായാണ് ഷൂട്ടിങ് പൂര്‍ത്തിയാവുക. മനോജ് കെ. ജയൻ, കലാഭവൻ ഷാജോണ്, ധർമജൻ ബോൾഗാട്ടി എന്നിവരും ചിത്രത്തിൽ മറ്റ് കഥാപാത്രങ്ങളെ അവതരിപ്പിക്കും. അരുണ്‍ ഗോപി തന്നെയാണ് ചിത്രത്തിന്‍റെ തിരക്കഥയും തയാറാക്കിയിരിക്കുന്നത്. അഭിനന്ദ് രാമാനുജൻ ഛായാഗ്രഹണവും ഗോപിസുന്ദർ സംഗീതവുമൊരുക്കുന്നു. മുളകുപാടം ഫിലിംസിന്‍റെ ബാനറിൽ ടോമിച്ചന്‍ മുളകുപാടമാണ് ചിത്രം നിര്‍മിക്കുന്നത്.
