'മരുന്ന് സംഭരണ കേന്ദ്രങ്ങളിൽ സുരക്ഷാ ഓഡിറ്റ് നടത്തും'
തിരുവനന്തപുരം: കിന്ഫ്ര പാര്ക്കിലെ മെഡിക്കല് സര്വീസസ് കോര്പറേഷന്റെ സംഭരണ കേന്ദ്രത്തിലുണ്ടായ തീപിടിത്തത്തെത്തുടര്ന്ന് കോര്പറേഷന്റെ എല്ലാ മരുന്ന് സംഭരണ കേന്ദ്രങ്ങളിലും സുരക്ഷാ ഓഡിറ്റ് നടത്തുമെന്ന് ആരോഗ്യമന്ത്രി വീണാ ജോർജ്. ആരോഗ്യ വകുപ്പ്, ഫയര്ഫോഴ്സ്, പൊലീസ്, കെമിക്കല് വിദഗ്ധര് എന്നിവരുടെ നേതൃത്വത്തിലാണ് സുരക്ഷാ ഓഡിറ്റ് നടത്തുന്നത്. ആശുപത്രികളില് ഫയര് സേഫ്റ്റി ഓഡിറ്റ് നടത്തുമെന്നും മന്ത്രി അറിയിച്ചു.
കിന്ഫ്രയിലെ തീപിടിത്തത്തെപ്പറ്റി സമഗ്ര അന്വേഷണത്തിന് നിര്ദേശം നല്കിയിട്ടുണ്ട്. ഫോറന്സിക് ഉള്പ്പെടെയുള്ള പരിശോധനകള് നടത്തും. കൊല്ലത്തെ തീപിടിത്തത്തിന്റെ ഫോറന്സിക് പരിശോധനാ ഫലത്തിനായി കാത്തിരിക്കുകയാണെന്നും വീണാ ജോർജ് വ്യക്തമാക്കി.
കൊല്ലത്തെ തീപിടിത്തത്തിന് ശേഷം എല്ലാ മരുന്ന് സംഭരണ കേന്ദ്രങ്ങള്ക്കും ജാഗ്രതാ നിര്ദ്ദേശം നല്കണമെന്നും പരിശോധന നടത്തണമെന്നും കെ.എം.എസ്.സി.എല്.ന് നിര്ദേശം നല്കിയിരുന്നു. ഇതനുസരിച്ച് പരിശോധനയും ക്രമീകരണവും നടത്തി നടപടി സ്വീകരിച്ചിരുന്നു. അതിനിടയിലാണ് തിരുവനന്തപുരത്തെ തീപിടിത്തം. കൊല്ലത്തേയും തിരുവനന്തപുരത്തേയും കെട്ടിടങ്ങള് 10 വര്ഷത്തിലധികമായി കെ.എം.എസ്.സി.എന്റെ ഗോഡൗണുകളായി പ്രവര്ത്തിച്ചു വരുന്നവയാണ്. തീ അണയ്ക്കുന്നതിനിടെ അഗ്നിരക്ഷാസേനാംഗം മരിക്കാനിടയായ സംഭവം അങ്ങേയറ്റം വേദനാജനകമാണെന്നും ആരോഗ്യമന്ത്രി പറഞ്ഞു.
