ആമസോൺ കാടിന് നടുവിൽ ഭീമൻ തിമിംഗലത്തിന്റെ ജഡം കണ്ടെത്തി
മരാജോ: ആമസോണ് കാടിന് നടുവിലായി 36 അടി നീളമുളള കൂറ്റന് തിമിംഗലത്തിന്റെ ജഡം കണ്ടെത്തി. ബ്രസീലിയന് ദ്വീപായ മരാജോയിലാണ് ജഡം കണ്ടെത്തിയത്. ആമസോണ് നദിയില് നിന്നും 15 മീറ്റര് അകലെയാണ് മരാജോ. എന്നാൽ ഇത്രദൂരം ജഡം എങ്ങനെയെത്തി എന്ന അന്വേഷണത്തിലാണ് അധികൃതർ. തിമിംഗലം നേരത്തെ ചത്തിട്ടുണ്ടാവും, ഉയർന്ന തിരമാല കാരണം ജഡം തീരത്തടിഞ്ഞതാകാമെന്നും മരാജോ ദ്വീപിലെ സന്നദ്ധ സേവന പ്രവര്ത്തകര് വ്യക്തമാക്കി.
ഒരുവയസ് പ്രായം വരുന്ന തിമിംഗലത്തെ കണ്ടൽ കാടുകൾക്കിടയിലാണ് കണ്ടെത്തിയത്. വളരെ അപൂർവമായി മാത്രമാണ് കടലില് നിന്നും അകലെയായി തിമിംഗലത്തിന്റെ ജഡം കാണപ്പെടാറുളളത്. ഇതിന്റെ ചിത്രങ്ങൾ സാമൂഹ്യമാധ്യമങ്ങളിൽ
വൈറലായിക്കൊണ്ടിരിക്കുകയാണ്. തിമിംഗലത്തിന്റെ മരണ കാരണം എന്താണെന്ന് വിദഗ്ദ്ധ പരിശോധനയിലൂടെ കണ്ടെത്തുമെന്ന് അധികൃതർ അറിയിച്ചു.
