നടിയെ ആക്രമിച്ച കേസ്; വിചാരണ കാലാവധി ആറ് മാസം കൂടി നീട്ടി
ന്യൂഡല്ഹി: നടിയെ ആക്രമിച്ച കേസിലെ വിചാരണ പൂര്ത്തിയാക്കാന് ആറ് മാസത്തെ സമയം കൂടി സുപ്രീം കോടതി അനുവദിച്ചു. വിചാരണ കോടതി ജഡ്ജിയുടെ ആവശ്യം പരിഗണിച്ചാണ് കോടതി നടപടി. ഇത് അവസാനത്തെ നീട്ടലാണെന്നും ഇതില് കൂടുതല് സമയം നല്കില്ലെന്നും കോടതി വ്യക്തമാക്കി. പ്രത്യേക വിചാരണ കോടതി ജഡ്ജി ഹണി എം വര്ഗീസ് നല്കിയ ഹര്ജി ജസ്റ്റിസ് എ എം ഖാന്വില്ക്കര് അധ്യക്ഷനായ ബെഞ്ചാണ് പരിഗണിച്ചത്.
കഴിഞ്ഞ ഓഗസ്റ്റിൽ സുപ്രീംകോടതി പുറത്ത് ഇറക്കിയ ഉത്തരവ് പ്രകാരം വിചാരണ കോടതിയിലെ നടപടികൾ ഫെബ്രുവരി ആദ്യ വാരം പൂർത്തിയാകേണ്ടത് ആയിരുന്നു. എന്നാൽ പ്രോസിക്യൂട്ടർ ഹാജരാകാത്തതടക്കമുള്ള കാര്യങ്ങൾ ചൂണ്ടിക്കാട്ടി നിശ്ചിത സമയത്തിനുള്ളിൽ വിചാരണ പൂർത്തിയാക്കാൻ കഴിഞ്ഞില്ലെന്ന് വിചാരണ കോടതി ജഡ്ജി സുപ്രീംകോടതിക്ക് കൈമാറിയ കത്തിൽ വ്യക്തമാക്കുന്നു.
ഇത് രണ്ടാം തവണയാണ് വിചാരണ പൂര്ത്തിയാക്കാനുള്ള സമയം സുപ്രീം കോടതി നീട്ടിനല്കുന്നത്. നടന് ദിലീപ് പ്രതിയായ കേസിലെ വിചാരണ ആറ് മാസത്തിനുള്ളില് പൂര്ത്തിയാക്കണമെന്ന് 2019 നവംബര് 29ന് ജസ്റ്റിസുമാരായ എ.എം ഖാന്വില്ക്കര്, ദിനേശ് മഹേശ്വരി എന്നിവര് അടങ്ങിയ ബെഞ്ച് ഉത്തരവിട്ടിരുന്നു. എന്നാല് കോവിഡിനെ തുടര്ന്ന് ഏര്പ്പെടുത്തിയ ലോക്ഡൗണ് കാരണം വിചാരണ നീണ്ടു പോയി. ഇതിനിടയില് വിചാരണ കോടതി ജഡ്ജി ആവശ്യപ്പെട്ടതിനെ തുടര്ന്ന് വിചാരണ പൂര്ത്തിയാക്കാന് 2020 ഓഗസ്റ്റില് ആറ് മാസം കൂടി സുപ്രീം കോടതി അനുവദിച്ചിരുന്നു.
