ന്യൂസിലന്‍ഡിലെ ജസീന്‍ഡ ആര്‍ഡേന്‍ മന്ത്രിസഭയില്‍ അംഗമായി ചരിത്രം കുറിച്ച് എറണാകുളം പറവൂര്‍ സ്വദേശി പ്രിയങ്ക രാധാകൃഷ്ണന്‍. ആദ്യമായിട്ടാണ് ഇന്ത്യയില്‍നിന്നുള്ള ഒരാള്‍ ന്യൂസിലന്‍ഡില്‍ മന്ത്രിയാകുന്നത്. ഗ്രാന്‍റ് റോബര്‍ട്സണ്‍ ഉപപ്രധാനമന്ത്രിയായ മന്ത്രിസഭയില്‍ പ്രിയങ്കയ്ക്ക് സാമൂഹിക, യുവജനക്ഷേമം, സന്നദ്ധ മേഖലകളുടെ ചുമതലയാണ് ലഭിച്ചിട്ടുള്ളത്.
കൊച്ചി പറവൂര്‍ മാടവനപ്പറമ്പിലാണ് പ്രിയങ്കയുടെ വേരുകള്‍. മുത്തച്ഛന്‍ ഡോ. സി.ആര്‍. കൃഷ്ണപിള്ളയുടെ രാഷ്‌ട്രീയ പാരമ്പര്യം പേറിയ കൊച്ചുമകള്‍. ഇന്ത്യന്‍ നാഷണല്‍ കോണ്‍ഗ്രസിന്‍റെ സോഷ്യലിസ്റ്റ് വിങ്ങിന്‍റെ വക്താക്കളായിരുന്നു കൃഷ്ണപിള്ളയുടെ തറവാട്. ഐക്യ കേരളത്തിനായി വീറോടെ വാദിച്ച പൈതൃകം. കൃഷ്ണ പിള്ളയുടെ മകന്‍ രാമന്‍ രാധാകൃഷ്ണന്‍റെയും ഉഷയുടെയും മകളാണ് പ്രിയങ്ക. ജനിച്ചതു ചെന്നൈയില്‍ വളര്‍ന്നത് സിംഗപ്പൂരില്‍. പ്രിയങ്ക 14 വർഷമായി ലേബർ പാർട്ടി പ്രവർത്തകയാണ്. ക്രൈസ്റ്റ് ചർച്ച് സ്വദേശിയും ഐടി ജീവനക്കാരനുമായ റിച്ചാർഡ്‌സാണ് ഭർത്താവ്.
വെല്ലിംഗ്ടണിലെ വിക്ടോറിയ യൂണിവേഴ്‌സിറ്റിയില്‍നിന്നു ഡവലപ്‌മെന്റ് സ്റ്റഡീസില്‍ ബിരുദാനന്തര ബിരുദം നേടിയ പ്രിയങ്ക മീഡിയ സ്റ്റഡീസിലും സോഷ്യോളജിയിലും പഠനം പൂര്‍ത്തിയാക്കിയിട്ടുണ്ട്. പോളിസി നയവിശകലനം, സാമൂഹ്യസേവനം എന്നീ മേഖലകളില്‍ സജീവമായി.
