അന്വേഷണം ശക്തമാക്കാൻ ക്രൈംബ്രാഞ്ച് :ദിലീപിന്റെ ശബ്ദ പരിശോധന ഇന്ന്
കൊച്ചി: നടിയെ ആക്രമിച്ച കേസിലെ അന്വേഷണ ഉദ്യോഗസ്ഥരെ വധിക്കാന് ഗൂഢാലോചന നടത്തിയ കേസില് ദിലീപിന്റെ ശബ്ദ പരിശോധന ഇന്ന്.രാവിലെ പതിനൊന്ന് മണിക്ക് ചിത്രാഞ്ജലി ലാബിലെത്താന് പ്രതികള്ക്ക് നിര്ദേശം നല്കി.
ദിലീപിനെ കൂടാതെ സഹോദരന് അനൂപ്, സഹോദരീ ഭര്ത്താവ് സുരാജ് എന്നിവരും ഹാജരാകണമെന്നാണ് ആലുവ ജുഡിഷ്യല് ഫസ്റ്റ് ക്ലാസ് മജിസ്ട്രേട്ട് കോടതിയുടെ നിര്ദേശം. സംവിധായകന് ബാലചന്ദ്രകുമാര് ഹാജരാക്കിയ സംഭാഷണത്തിലെ ശബ്ദം പ്രതികളുടേത് തന്നെയാണെന്ന് സ്ഥിരീകരിക്കാനാണ് പരിശോധന നടത്തുന്നത്.
എഫ് ഐ ആര് റദ്ദാക്കണമെന്നാവശ്യപ്പെട്ട് ഹൈക്കോടതിയെ സമീപിക്കാനാണ് പ്രതിഭാഗത്തിന്റെ തീരുമാനം. കേസില് ഇന്നലെ ദിലീപ് അടക്കമുള്ള പ്രതികള്ക്ക് കര്ശന ഉപാധികളോടെ ഹൈക്കോടതി മുന്കൂര് ജാമ്യം അനുവദിച്ചിരുന്നു. വ്യാജമായി കെട്ടിച്ചമച്ച കേസാണിതെന്ന് ചൂണ്ടിക്കാട്ടിയാണ് മുന്കൂര് ജാമ്യാപേക്ഷ നല്കിയത്. ഇതു കോടതിയില് സ്ഥിരീകരിക്കാനായ സാഹചര്യത്തില് കേസ് റദ്ദാക്കാനും സാധിക്കുമെന്നാണ് ദിലീപിന്റെ കണക്കുകൂട്ടൽ.
