പ്രവാസികളുടെ മടക്കം ഈ ആഴ്ചമുതല്: ആദ്യ സംഘം മാലിയില് നിന്ന്
ഇന്ത്യയിലേക്ക് മടങ്ങുന്ന പ്രവാസികളില് 200 പേരുടെ ആദ്യ സംഘത്തെ ഈ ആഴ്ച തന്നെ മാലിയില് നിന്ന് കൊച്ചിയിലെത്തിക്കും. കപ്പല് മാര്ഗമാണ് ഇവരെ കൊച്ചിയില് എത്തിക്കുക. ഇവരുടെ മടക്കയാത്രയുമായി ബന്ധപ്പെട്ട് കേന്ദ്ര സര്ക്കാര് സ്റ്റാന്റേഡ് ഓപ്പറേറ്റിങ്ങ് പ്രൊസീജിയര് തയ്യാറാക്കി കഴിഞ്ഞു.
കൊച്ചിയില് എത്തുന്നവര് 14 ദിവസം കൊറന്റൈനില് കഴിയണം. കൊറന്റൈനില് കഴിയുന്നതിനുള്ള ചെലവ് പ്രവാസികള് വഹിക്കണം. എന്നാല് നാട്ടിലേക്കുവരുന്ന പ്രവാസികളിൽ നിന്നും കപ്പൽ യാത്രയുടെ പണം ഈടാക്കാന് തത്കാലത്തേക്ക് തീരുമാനം ഇല്ല. കൊച്ചിയില് നിന്നുള്ള മടക്ക യാത്രയ്ക്ക് ഉള്ള ചെലവും പ്രവാസി വഹിക്കണം.
പതിനാല് ദിവസത്തിന് ശേഷം ഇവര് സ്വന്തം സ്ഥലങ്ങളിലേക്ക് മടങ്ങുന്നതിനെ കുറിച്ച് കേരള സര്ക്കാരും കേന്ദ്ര സര്ക്കാരും തീരുമാനം എടുക്കും എന്നും വിദേശകാര്യമന്ത്രാലയ വൃത്തങ്ങള് അറിയിച്ചു.
