ചൊവ്വയില്‍ വെള്ളമുണ്ട്; തെളിവുകള്‍ ഇതാ പുറത്ത്

ചൊവ്വയില്‍ വെള്ളമുണ്ടെന്ന് വാദം ശക്തിപ്പെടുത്തുന്ന തെളിവുകളുമായി യൂറോപ്യന്‍ ബഹിരാകാശ ഏജന്‍സി.  
ചൊവ്വയുടെ ഉപരിതലത്തിലുള്ള ഐസ് തടാകം പോലെ തോന്നുന്ന മഞ്ഞില്‍ പുതഞ്ഞ വന്‍ കുഴിയുടെ ചിത്രം സഹിതമുള്ള തെളിവ് നല്‍കിയാണ് ഇഎസ്എ വാദം ഉന്നയിച്ചിരിക്കുന്നത്.  
നാസയുടെ പേടകങ്ങൾ പകർത്തിയ നിരവധി ചിത്രങ്ങൾ പുറത്തുവന്നിട്ടുണ്ടെങ്കിലും ഇതുപോലൊരു ചിത്രം ആദ്യമായാണ് ഭൂമിയിലേക്ക് എത്തുന്നത്.

ഐസുകളാൽ മൂടിപ്പുതച്ച് കിടക്കുന്ന വൻ ഗർത്തത്തിന്റെ ചിത്രമാണ് പുറത്തുവന്നത്. ഭൂമിക്ക് പുറത്ത് ജലമുണ്ടോ എന്നന്വേഷിക്കുന്നവര്‍ക്ക് ഏറെ പ്രതീക്ഷ നൽകുന്നതാണ് ഈ ചിത്രം. ചൊവ്വയുടെ ഉത്തര ധ്രുവത്തിൽ 82 കിലോമീറ്റർ വ്യാപ്തിയുള്ള കോറോലെവ് ഗര്‍ത്തത്തിലാണ് മഞ്ഞു കണ്ടെത്തിയിരിക്കുന്നത്. മഞ്ഞു നിറഞ്ഞുകിടക്കുന്ന വലിയ തടാകം പോലെയും തോന്നിക്കുന്നതാണ് ചിത്രം.

ഏകദേശം 200 കിലോമീറ്റര്‍ ആഴത്തില്‍ വരെ മഞ്ഞുണ്ടെന്നാണ് കണക്കാക്കുന്നത്. കൂടാതെ ഗര്‍ത്തത്തില്‍ 2200 ക്യുബിക് കിലോമീറ്റര്‍ മഞ്ഞുണ്ടെന്നും ഗവേഷകര്‍ പറയുന്നു.ചൊവ്വ ഗവേഷണത്തിന് യൂറോപ്യന്‍ ബഹിരാകാശ ഏജന്‍സി 2003-ല്‍ അയച്ചതാണ് മാര്‍സ് എക്സ്പ്രസ് ഓര്‍ബിറ്റര്‍.  
15 വർഷം പൂർത്തിയാകാൻ ദിവസങ്ങൾ മാത്രം ശേഷിക്കെയാണ് അദ്ഭുതപ്പെടുത്തുന്ന ഈ ചിത്രം അയച്ചിരിക്കുന്നത്.