പത്താം ക്ലാസ് വിദ്യാര്‍ഥിനി ഫ്‌ളാറ്റിന്‍റെ മുകള്‍ നിലയില്‍നിന്നു വീണു മരിച്ചു
കോട്ടയം: കോട്ടയത്ത് മുട്ടമ്പലത്ത് ഫ്‌ലാറ്റിലെ 12-ാം നിലയില്‍നിന്നുവീണ പെണ്‍കുട്ടിയെ മരിച്ച നിലയില്‍ കണ്ടെത്തി. മുട്ടമ്പലം സ്‌കൈലൈന്‍ എക്‌സോട്ടിക്കാ ഫ്‌ലാറ്റിലെ 12ബി വണ്ണില്‍ താമസിക്കുന്ന ജോണ്‍ ടെന്നി കുര്യന്റെയും ശില്‍പ്പയുടെയും മകള്‍ റെയ(15)യാണ് മരിച്ചത്. കോട്ടയം പള്ളിക്കൂടം സ്‌കൂളിലെ പത്താം ക്ലാസ് വിദ്യാര്‍ഥിനിയാണ്.
ശനിയാഴ്ച രാത്രി പത്തുമണിയോടെയാണ് സംഭവം. ശബ്ദം കേട്ട് എത്തിയ സെക്യൂരിറ്റി ജീവനക്കാരനാണ് പെണ്‍കുട്ടി വീണുകിടക്കുന്നത് കണ്ടത്. ഉടന്‍ പോലീസില്‍ വിവരമറിയിച്ചു. കണ്‍ട്രോള്‍ റൂം പോലീസെത്തിയാണ് ജില്ലാ ആശുപത്രിയിലെത്തിച്ചത്. അപ്പോഴേക്കും മരണം സംഭവിച്ചിരുന്നു.
അച്ഛന്‍ ജോണ്‍ ടെന്നി കുര്യന്‍ യു.എസില്‍ ഐ.ടി. മേഖലയിലാണ്. ഇവര്‍ നേരത്തെ യു.എസിലായിരുന്നു. നാലുവര്‍ഷമായി പെണ്‍കുട്ടി അമ്മയ്‌ക്കൊപ്പം മുട്ടമ്പലത്തെ ഫ്‌ലാറ്റിലാണ് താമസം. ഒരു സഹോദരിയുണ്ട്.
